Дастафшонии барг аз паси бод
Интизории ману рафтани бедарди туро орад ёд
Гар ҷаҳон сӯи ба сӯ ҷода бувад
Корам нест
Ғамам он аст ки ту меравӣ аз манзари ман
Гар ҳаёт омадану рафтани ишқ асту умед
Корам нест
Бимам он аст ки боре чу насим
Ту наойӣ ба суроғи кафи хокистари ман
Гар зи фарҳанги ҷаҳон пок кунам
вожаи паймоншикани «рафтан»-ро
Суде нест
Гар дусад бор «биё!» гӯяму афғон фиканам
Оғуши орзуи ман холист
Бигудозам ҳама ҳиҷрону ҷудоӣ ба масал
Васли як лаҳза нагардад ҳосил
Ҷамъ орам ғаму андӯҳи замонро яксар
Нашавад ҳеҷ баробар ба дами шодии дил
Беҳ ки аз васли ту афсона кунам
Ҳаҷри ҷонсахти миёни моро
Масту девона кунам
Бевафоии вафоро ба кафи ҷодуи ишқ
Ҷинси бегона кунам
Мешиносӣ гули якдонаи ман
Ғами афсонаи ман?